Метаболизммен байланысты стеатогепатит — семіздік пен екінші типті қант диабетімен байланысты бауырдың май басу ауруының агрессивті түрі. Бұл дерт жылдар бойы еш белгісіз өтіп, біртіндеп фиброзға, циррозға, бауыр жеткіліксіздігіне және бауыр обырына алып келуі мүмкін.

Жаңа препарат қазіргі қолданыстағы тәсілдердің көбінен өзгеше әсер етеді. Ол тек салмақ тастауға көмектесіп қана қоймай, бауырда майдың жиналу механизмінің өзіне тікелей ықпал етеді.

ION224 бауыр жасушаларында майдың түзілуі мен жиналуына қатысатын DGAT2 ферментін бөгейді. Зерттеушілердің пікірінше, дәл осы артық май қабыну мен тіндердің тыртықтануын қоздырады.

«Біз аурудың түпкі себебіне әсер етеміз — бауырдағы майдың жиналуы мен қабынуды тікелей тоқтатамыз», — деді зерттеу жетекшісі Рохит Лумба.

Клиникалық сынақтың екінші кезеңіне MASH диагнозы қойылған және бауыр фиброзының жеңіл немесе орташа түрі бар 160 пациент қатысты. 51 апта бойы олар препаратты әртүрлі мөлшерде ай сайын инъекция түрінде немесе плацебо қабылдады.

Ең жоғары нәтиже препараттың максималды дозасын алған пациенттерде байқалды. Олардың шамамен 60%-ында плацебо тобымен салыстырғанда бауыр жағдайының айтарлықтай жақсарғаны анықталды. Зерттеушілер емге байланысты ауыр жанама әсерлерді тіркемеген.

Келесі кезеңде препараттың тиімділігі мен қауіпсіздігін реттеуші органдар мақұлдар алдында растау үшін ауқымдырақ клиникалық зерттеулер жүргізіледі.