Сәтбаев университетінің ғалымдары өндірістің әртүрлі саласында жуғыш және тазартқыш заттар, дисперстік жүйелердің тұрақтылығын реттегіштер, көбіктүзгіштер, флотореагенттер, бактерицидтік қосылыстар ретінде және басқа мақсаттарда пайдалануға болатын жаңа БАЗ-дарды қоры сарқылмайтын, экологиялық қауіпсіз табиғи (өсімдік тектес) шикізат көзінен синтездеу және өндіру технологиясын жасады.
Зерттеу барысында техникалық өсімдік майынан жаңа неионогендік, катиондық және аниондық БАЗ-дар синтезделіп, заманауи физика-химиялық әдістер арқылы олардың коллоидтық-химиялық және беттік қасиеттері анықталды. Aspen Hysys бағдарламасы арқылы БАЗ өндіру процесінің технологиялық сызба-нұсқасы жасалды. Жаңа БАЗ-дардың көбіктүзгіштік, эмульсиятүзгіштік, жұқтырғыштық, коагулияциялық, флокуляциялық және биоцидтік қасиеттері дәлелденді.
Алынған жаңа БАЗ-дарды тиімді жұқтырғыш, флокулянт, коагулянт, эмульгатор, көбіктүзгіш және биоцидтік қосылыстар ретінде қолдануға болады. Олар өздерінің коллоидтық-химиялық және беттік қасиеттері бойынша қолданыстағы импорттық аналогтарынан кем түспейді. Ал қолжетімді шикізат – күнбағыс майы өндірісінің қалдығын (бағасы 310 теңге/кг) пайдалану арқасында олардың өзіндік құны белгілі аналогтармен салыстырғанда, шамамен, 20-30%-ға арзан болады.
Келешекте алынған жаңа БАЗ-дарды коммерциялизациялап, өндірістік масштабта өндіру мәселесімен айналысу көзделіп отыр.
Ғылыми жоба: АР19678114 «Табиғи шикізат қорынан экологиялық қауіпсіз беттік-активті заттар синтездеу және қасиеттерін зерттеу»
Жетекшісі: Бас ғылыми қызметкер, химия ғылымдарының докторы, профессор К.Ж. Әбдиев
Фото жасанды интеллект (Chat GPT) арқылы жасалды
