Академик Е.А. Бөкетов атындағы Қарағанды университетінің ғылыми қызметкерлері қол жетімді қымбат емес шикізат негізінде тиімді тығыздағыш және желімдегіш материалдардың отандық рецептураларын жасауда.
Отандық өндірістің герметиктері мен желімдерінің құны төмен әрі көп еңбекті де қажет етпейді. Сондай-ақ, құрылыс-монтаждау жұмыстарының сапасын арттырмақ.
Дүниежүзілік нарықта тығыздағыш және желімдегіш материалдарға деген сұраныс та оны өндірушілер де артып келеді. Соңғы аналитикалық зерттеулердің бірінде герметиктер мен желімдерге деген жаһандық сұраныс жылына орта есеппен 5%-ға, 2022 жылы 2,0 миллион тоннаға өседі делінген.
Желімдегіш заттарға құрылыс индустриясы, өңдеу өнеркәсібі, электроника өндірісі және қаптама жұмыстарында сұраныс көп. Ол көбінесе дамушы елдерде байқалады екен.
Маркетингтік талдау көрсеткендей, Қазақстан нарығында желім импортының үлесі өте жоғары. Қазіргі уақытта Қазақстанда герметикалық және желім материалдарын шығаратын отандық өндіруші жоқ. Өз кезегінде қарқынды дамып келе жатқан заманауи тәсілдер, құрылыстағы, машина жасаудағы, авиациялық құрылыстағы, сондай-ақ жөндеу және тұрмыстық қызмет көрсетудегі технологиялар құрылыс химиясының отандық материалдарын өндіру қажеттілігін туғызып отыр.
Қарағандылық ғалымдар қанықпаған карбон қышқылдары мен амидтері бар қанықпаған полиэфирлі шайырлардың сополимерлері негізінде ауа райына төзімді жаңа тығыздағыш материалдар мен желімдер жасау үшін инновациялық әзірлемелерді ұсынады.
Отандық ғалымдар ұсынып отырған инновацияны қару-жарақ оқ-дәрілері мен артиллериялық қондырғыларды пломбалаудан бастап станок жасау мен құрылыстағы құрама бұйымдар мен металл конструкциялардың түйіспелеріне дейін қолдануға болады.
Ғылыми зерттеу нәтижеснде мамандар қолда бар және арзан шикізаттан жаңа тығыздағыштар мен желімдер жасап, импортты алмастыратын жаңа өнімдер мен материалдарды өндіріске енгізбек.
Бұл еліміздің машина жасау, қорғаныс және құрылыс өнеркәсібі кәсіпорындарында сұранысқа ие түпкілікті өнімнің өзіндік құнын төмендетуге септігін тигізеді.
