Бүгін ҰМҒТСО АҚ ұжымы ECO Network жобасының негізін қалаушы Евгений Мұхамеджановпен кездесті. 

Спикердің экологиялық бастамалардың корпоративтік мәдениетті қалай өзгертетіні, брендтің сыртқы позициясына әсер ететіні және сайып келгенде, әрбір қызметкердің тиімділігі мен бүкіл ұжымның өнімділігінің артуына алып келетіні туралы сөзі іс-шараның барлық қатысушыларын шабыттандырды.

Жасыратыны жоқ, көпшілігіміз экологиялық проблемалар үшін жауапкершілікті мемлекетке, ірі компанияларға жүктейміз. Бірақ, жауапты да орынды тұтынуды өзімізден бастауымыз керектігін естен шығармағанымыз жөн.  

Баяндамашы Е. Мұхамеджанов өнімді саналы түрде тұтынудың жеке жолын алға тартты. Әр адамның өзінің артынан экологиялық жағынан зиянды әрі улы «іздерін» қалдырмауға мүмкіндігі бар. Бұл идеяны ірі компаниялар қолдаса, нәтиже ондаған және жүздеген есе артады. 

Ғаламшардың саулығына қамқорлық жасағың келсе, ең алдымен, өз денсаулығыңды, отбасыңның амандығын, балаға дұрыс тәрбие беруден бастау керек. Мәселен, улы пластикті бей-берекет пайдалану салдарынан оның қалдықтары адамдар мен жануарлардың ағзасынан табылады. Бұл мәселені шешу жолы – оны өндіруге және пайдалануға толық тыйым салу ғана. Сондай-ақ, әрбір тұтынушы пластикалық өнімдерді сатып алудан бас тартуы тиіс. 

«Жасыл офис» жобасы компанияның электронды құжат айналымына көшу және қағазды пайдалануды азайту, қалдықтарды бөлек жинау және жалпы алғанда бөлмедегі жылуды тиімді тұтыну және сақтау, электр энергиясын үнемдеу, суды ысырап етпеу және қызметтің басқа да аспектілері бойынша жүйелі шараларды қарастырады.Бұл қарапайым болып көрінетін нәрселерге көшу жүйелі және ойластырылған көзқарасты талап етеді, әйтпесе әдемі мәлімдемелер мен уәделер деңгейінде ғана қалуға болады.

Ресурстарды үнемдеу адамзат түйсігінің өзгеруіне ықпал етіп, үлкен ішкі өзгерістердің бастамасы болуы керек. Тұрақты даму қағидаттарын жүзеге асыру, «жасыл экономикаға» көшу әрбір қазақстандықтың отбасынан, әрбір қазақстандық компаниядан басталуы тиіс. Өнімді тиімді тұтыну, қалдықтарды бөлу, бір рет қолданылатын улы заттардан бас тарту, су мен энергияны үнемдеу, күнделікті өмірде артық нәрселерден бас тарту мәдениетіміздің бір бөлігіне айналуы тиіс. 

Қазақстандық жасыл компаниялардың әрбір отбасына қосыла отырып, барлық серіктестер мен әріптестерді біздің шешімімізді қолдауға, ал тәжірибесі барларды идеялармен және озық тәжірибемен алмасуға шақырамыз.

Біз ақпараттық ресурстарымызда тұрақты «жасыл» өмір салтын қалыптастыру жолындағы өзгерістер мен қайта құрулар туралы айтатын боламыз.