Жауғашты АХМЕТОВ, Асфендияров атындағы Қазақ ұлттық медицина университетінің патологиялық анатомия кафедрасының профессоры, жоғары санатты дәрігер-патологоанатом:
– Сіз 48 жылдан бері патологиялық анатомия саласында жемісті жұмыс істеп келе жатқан білгір мамансыз, 10 жыл бойы Алматы Денсаулық сақтау департаментінің бас маманы болдыңыз. Қазақстандағы медициналық оқу орындарының студенттері сіз жазған «Патологиялық анатомия» оқулығымен оқып келе жатқанын да айта кеткен жөн. Осы орайда әуелі оқырмандарға патологиялық анатомия секілді құпиясы түпсіз ғылым туралы түсіндіре кетсеңіз орынды болар еді. Мәселен, биопсия адам өмірі үшін қаншалықты маңызды?
– Биопсиялық зерттеулердің маңызы ауруды, әсіресе, қатерлі ісіктерді өз мерзімінде анықтауға қатысты. Ауруды анықтау үшін алдымен биопсия жасалады. Биопсия – сырқаттың ағзасынан алынатын кесінді материал. Әсіресе, қатерлі ісікті анықтауда таптырмас амал әрі ең бірегейі. Мысалы, асқазанның қатерлі ісігі бірінші сатысында анықталса, аурудың 95 пайызы толығымен жазылып кетеді (Жапония ғалымдарының деректері), ал егер ауру 2-3 сатыға жеткен болса, бұл көрсеткіш 50 пайызға дейін төмендейді. Эндоскопист мамандар көлемі 0,2-0,5 см ошақтарды тауып бізге жібереді, ол қатерлі ісік пе немесе қатерсіз өзгерістер ме, оны тек патологоанатом анықтайды.
– Яғни ауру диагнозын дәл анықтауда аса маңызды биопсиялық зерттеулер міндетті түрде керек дейсіз ғой?
– Әрине. Биопсия тірі адамнан материал алып, ауру диагнозын дұрыс және өз мерзімінде қою үшін қажет. Биопсияның түрлері де, алыну жолдары да өте көп. Мысалы, операция жасалып жатқан кезде алынып жіберілетін биопсияны – цитобиопсия деп атайды (цито – тез, жедел деген сөз). Патологоанатом 15-20 минут ішінде ауру диагнозын анықтап беру керек, себебі ауру наркоз жағдайында жатады. Аурудың арғы тағдыры, жасалатын операцияның көлемі осы диагнозға байланысты. Мысалы, сүт безіне операция жасағанда маммолог дәрігерлер цитобиопсия жауабын күтеді. Операция кезінде алынған кез келген материал патанатомия бөліміне жіберіледі, сол жерде материал жан-жақты қаралып, әрі қарай лабораториялық зерттеуге бағытталады. 3-4 тәуліктен кейін биопсияны патологоанатом дәрігер микроскопта қарап, патологиялық үдерістердің нақты, гистологиялық диагнозы қойылады. Қазіргі таңда ағзалардан арнайы аспаптармен алынатын эндоскопиялық биопсиялардың саны жыл сайын артуда. Жиі зерттелетін биопсиялар өңештен, асқазаннан, ішектерден, бронхтардан алынатын биопсиялар.
– Елімізде әйелдер арасында бірінші орында сүт безінің қатерлі ісігі тұр екен. Ондай жағдайда дәрігерлердің бірден ота жасауға көшуі дұрыс па?
– Дәрігерлер қателік жібермес үшін әуелі ағзадан материал алып, биопсия арқылы анықтауы тиіс. Патологоанатомның қорытынды шешімін-сіз хирургтар нақты шешім шығара алмайды. Анық-қанығына көз жеткізбей, «ісік» деп ота жасап жіберген жағдайда, сотқа беруге әбден болады.
Биопсиялық зерттеулердің гинекологиялық аурулар диагнозын қоюда да маңызы зор. Бұрын тек жатыр қырындысын ғана зерттейтін болсақ, қазір гистерскопиялық әдіспен алынған клиникалық материалдарды да жиі қараймыз. Гинекологиялық операциялар кезінде жиі-жиі цитобиопсиялар да алынады. Көп жағдайларда аурулар жатырдан қан кету белгілерімен келеді. Оның себептері өте көп: қабыну, жүктілік, гормондар тепе-теңдігінің бұзылуы, қағанақ тығыны (пузырный занос), хорион-эпителиома және де басқа ісіктер. Гистологиялық зерттеулер осы патологиялық жағдайларды бір-бірінен ажыратып, ауруды дұрыс емдеу үшін аса қажет.
Гинекологиялық патологияны, әсіресе, қатерлі ісіктерді бір-бірінен ажырату оңай шаруа емес. Мен өз практикамнан бір мысал келтірейін. 27 жастағы әйел жыныс ағзаларынан қан кету белгілерімен ауруханаға түсіп, қан ағуды тоқтату үшін жатырдан қырынды алынады. Сол материалды бөлім меңгерушісі З. (мед ғылым кандидаты), белгілі патологанатом-доцент және кафедра меңгерушісі-профессор көріп: жатырдың мезодермалды ісігі деген диагноз қойған, сол материалды мен көріп бұл жерде ешқандай қатерлі ісік жоқ, биопсияда тек жүктілік қалдықтары бар дедім. Осылайша, келіспеушілік болғандықтан, жаңағы әйелді бір айдан соң қайта шақырып диагностикалық қырынды алдық, ол материалда ешқандай ісік жоқ екендігі анықталды, сөйтіп, бір жас әйелдің өмірі сақталып қалды. Мұндай жағдайлар менің практикамда талай болған. Мысалы, қалалық клиникаға 45 жастағы ер кісі асқазаннан қан кетіп түседі. Операция кезінде хирургтар асқазандағы өзгерістерді қатерлі ісік деп бағалап, асқазанның 2/3 бөлігін кесіп алып тастаған. Гистологиялық зерттеуден кейін асқазанда қатерлі ісік емес, мерездік қабыну (сифилис) бар екендігі анықталды. Егер ол ауру әрі қарай асқазанның қатерлі ісігі деп емделсе, өміріне қауіп төнер еді. Диагнозы анықталғаннан кейін ауру арнайы емге жіберілді. Басқа мамандардың пікіріне қосыла салмай, өз диагнозыңды дәлелдеп шығу, әркімнің маңдайына жазылмаған.
– Біз патологанатом дәрігерлерге сенеміз, бірақ олардың қателіктерге ұрынатын кездері жиі бола ма?
– Әр жылы Алматыда 300 мыңнан астам биопсиялық зерттеулер жүргізіледі. Биопсия саны артқан сайын, потологоанатомдар тарапынан жіберілетін қателіктер саны да көбеюде, бұл – аурудың тағдыры үшін өте қауіпті жағдай. Қатерлі ісік деп дұрыс диагноз қойылмаса, керексіз операциялар жасалып немесе қажетсіз химиотерапиялық емдер жүргізіліп, ауру өміріне қауіп төнуі мүмкін. Алматы сынды алып мегаполисте биопсияларды анық ажырата алатын маман-патологоанатомдар саны саусақпен санарлық екендігі қынжылтады.
– Басқа аймақтарда бұл мәселеде жағдай қалай екен?
– Басқа аймақтарда да бұл шешімін таппаған мәселе десек, артық айтқандық емес. 2012 жылы Астанадағы үкіметтік емханада қаралып жүрген, Мәжіліс депутаты, банк жүйесінің белгілі маманы Б. деген кісі біздің бұрыннан таныстығымызды пайдаланып, өз биопсиясын алып келді. Астанада «Қуықасты безінің қатерлі ісігі» деген диагноз қойып, химиотерапияны бастап жіберген екен. Мен көріп, бұл жерде қатерлі ісік жоқ, бірақ ол күмәнді сейілту үшін, осы жерде операция жасатыңыз дедім. Операцияда алынған материалда қуықасты безінің қатерсіз ісігі (аденома) анықталды. Сол кезде ол кісінің қуанып, секіргенін көрсеңіз. Бүгін ол кісінің дені сау, бір үлкен мекеменің бастығы болып жұмыс істеп жатыр.
2013 жылы Қарағанды облонкодиспансерінде 12 жастағы балаға жамбас сүйегінің хондросаркомасы (қатерлі ісік) деп диагноз қойған. Мен диагноз дұрыс еместігін айтып, баланы республикалық онкологиялық институтқа жатқыздым. Осы жерде жамбасына операция жасалды, диагнозы: алыпжасушалы ісік (қатерсіз ісік). Бүгінде Мұхаммедали 14-те, дені сау жүгіріп жүр. Осы екі жағдайда да патологоанатомдар қателік жіберіп отыр, сол қойылған диагноздармен химиотерапия алғанда, бүгін олардың жағдайы қалай болатыны белгілі.
– Енді не істеу керек, патологоанатомдар біліктілігін қалай көтереміз?
– Егер дұрыс диагноз қоюға патологоанатомдардың білімі жетпей жатса, бұл – медицина үшін аса қауіпті жағдай. Оның нәтижесі қалай болуы мүмкін екендігін мына мысалдардан кө-руге болады. 2012 жылы Асфендияров атындағы ұлттық медицина университетінің бір студентінің биопсиясын қарадым. Қалаға белгілі патологоанатом-маман қарап: «меланома кожи головы, 2-3-стадия по Кларку» деп диагноз койыпты. Меланома – өте қатерлі, тез метастаз беретін ісік. Студенттің жасы 20-да, төбесіне қарайып өскен ісік болған. Сол ісікке «Шпиц невусы» (қатерсіз ісік) деп диагноз қойып, ата-анасына, Алматыдағы басқа мамандар дауласып жүрмесін деп, Мәскеудегі онкология институтына консультацияға жіберуге кеңес бердім, менің диагнозым дұрыс деп табылды. Қазір сол студент 5-курста оқып жүр, меланома белгілері жоқ. Егер меланома деп, 20 жастағы, әлі үйленбеген бала, химиотерапия алғанда, не болатынын білесіздер.
Шынында да, патологоанатомдарды дайындау деңгейі республика бойынша төмен. Оларды дайындайтын білгір мамандар жеткіліксіз. Денсаулық сақтау министрлігі тарапынан бұл мәселеге аса көңіл бөлініп, қомақты қаржы жұмсалып, республика бойынша патологоанатомдарды дұрыс дайындауды жолға қою қажет. Оқытушы-профессорлардың біліктілігін шетелдегі ғылыми орталықтарға жіберіп көтеру керек.
– Сіз сонау 1989 жылдан бері өз мамандығыңызбен бір қатарда тілді дамыту, қазақ тілді терминдер жасау мәселесіне үзбей атсалысып келесіз. Осы орайда «Өз әліпбиімізді түзете алмай жүріп, латын біздің не теңіміз» деп үзбей дабыл қағып келе жатқаныңыз есіме түсіп отыр. Әлі де сол ойыңыздан айныған жоқсыз ба?
– Айнығам жоқ. Қазақ әліпбиінде неше әріп болуын шешпей отырып латын әліпбиіне өту – қазақ тілін құрту деген сөз. Тіл мамандары қазақ тілінде 9 дауысты,17 дауыссыз дыбыс бар дейді, әр дыбысқа бір әріп сәйкес келеді деп есептесек, әліпбиімізде 26 әріп болуы тиіс, ал бізде 42 әріп. Осы мәселе шешілмей, біз латын әліпбиіне көше алмаймыз. Ахмет Байтұрсынов атындағы Тіл білімі институты бұл мәселе бойынша өз ойларын ашық айтпай отыр, егер біз 42 әріппен латынға өте-тін болсақ, нағыз былық сонда басталады. Сондықтан Қазақстан халқы қазақ тіліне толық көшпей, бұл мәселені қозғау ерте. Әліпби құрамы, оның таңбасы мен емле-ережелері жан-жақты талқыланбай, тіл мамандары бір мәмілеге келмей, бұл мәселе шешілмейді. Әліпби – ұлт тағдыры, тіл жоқ жерде ұлт та жоқ, сондықтан латын графикасына ертең өтуге дайын желөкпелерден, қазақ тілінің науқандық «жанашырларынан» сақтану керек, себебі ертелі-кеш латын әліпбиіне көшеміз, бірақ алдымен өз әліпбиімізді түзетіп алуымыз керек.
– «Республикалық медициналық терминдер қалыптастыру орталығының» белді мүшесісіз. Термин түзу жөнінде не айтасыз?
– Мен 27 жасымда медицина ғылымының кандидаты болғанмын. 1989 жылы докторлық жұмысымды аяқтау үшін Мәскеуге кетер кезде кафедрада қазақ тілінде сабақ беретін, дәріс оқитын бір адам табылмай, Мәскеуге бармай, Алматыда қалып кеттім.
– Докторлық диссертациядан ұлт тағдырын жоғары қойдым дейсіз ғой...
– Енді... Ол кезде ең үлкен Ұлттық кітапхананың өзінде қазақ тілінде медицина бойынша бірде-бір оқулық жоқ болатын. Сол күннен бастап күн-діз күлкіден, түнде ұйқыдан қалып, патологиялық анатомия бойынша оқу құралдарын жазуға, сөздіктер құрастыруға кірісіп кеттім. Алғашқы оқу құралдары ротопринт арқылы басылып шыққанының өзі жағдайдың қиындығын көрсетіп тұр. Баспаларда оқулық шығару мүмкін болмады, баспахана жоспары алдын ала жарияланып, Оқу министрлігінде бекітіліп қана шығатын. Медицина атауларын қазақ тілінде сөйлету аса күрделі мәселе еді, себебі олар негізінен латын тілінде туындап, бізге орыс тілі арқылы жеткен. Осыған байланысты латын сөздерін баз қалпында (орысша транскрипциясы түрінде) қалдырған жөндеушілер баршылық, бірақ біздің сол кездегі мақсатымыз қазақ тілінің бар мүмкіндігін пайдаланып, ана тіліндегі оқулықтар тудыру болды. Тек қазақ тілін терең түсінген, өз мамандығын толық меңгерген, көп толғанып, көп ойлаған адам ғана төл терминдер тудыра алады» деген ойымды «Ана тілі» газеті ұжымы қолдап, мен ұсынған 145 терминді газеттің 1994 жылғы 18 нөмірінде «Медицинада жиі қолданылатын аталымдар» деген атпен басып шықты. 1994 жылы Қазақстанда алғаш рет «Патологиялық анатомия терминдерінің орысша-латынша-қазақша түсіндірме сөздігін» бастырып шығардым, ол жерде осы жеке пәннің 800 термині қамтылған болатын.
«Патологиялық анатомия» оқулығының жеке бөлімі алғаш рет «Ана тілі» баспасында 1993 жылы шыққанын айта кетейін. «Патологиялық анатомия» оқулығының екінші, жалпы бөлімі «Білім» баспасынан 1995 жылы басылып шықты. Осы оқулықтарым 1995 жылы Денсаулық сақтау министрлігінің медицина саласында қазақ тілінде жазылған оқулықтар арсында 3-орын алып, арнайы сыйлықпен марапатталды.
– Сіз «Жеті өлікке жан берген» делінетін үш жүзге пір болған Мүсірәлі Жәдікұлының жерлесі көрінесіз. Ол кісінің жерленген жері жайлы әртүрлі пікірлер бар. Сонда осы күнге дейін белгісіз бе?
– Мен Мүсірәлінің кіндік қаны тамған жерде дүниеге келдім. Көп ұлы адамдардың туған жері, жылы белгісіз болып жатады. Ұрпақтарының жартысы қазір Қарақалпақстанда. «Әйтеке би» деп аталатын кітапта «Мүсірәлі еліне Қызылқұмға қарай жол тартты» деп айтылған тұстар бар. Қызылқұм – Өзбекстандағы Тамды ауданында. Сол жерде Керізбұлақ деген жерде Бассай деген үлкен қорым бар. Сол қорымда қазір ұрпақтары жатыр. Сол себепті өмірге келген жері дау тудырмайды. Бірақ Мүсірәлі бабамыздың қайтыс болған жері белгісіз. Біреулер Қарақалпақстанда дейді, біреулер Баба Түкті Шашты Әзиздің жанына жерленген дейді.
Мүсірәлі бабамызға қатысты ел арасында мынандай да аңыз бар. Керізбұлақта жиын өткізіп Мүсірәлінің қасиетін сынамақшы болады. Тоқсан томарды өртеп «Сен пір болсаң, осы томардың үстіне шығып отыр, қасиетің бар ма, жоқ па, көрейік» дейді. Сонда Мүсірәлі жанып жатқан томардың үстіне жайнамазын жайып жіберіп, намазын оқып отыра береді. Томар жанып болған соң, шапанын қағып-қағып, орынан тұрады. Еш жері күймеген, тек шапанының бір шеті ғана күйген екен. «Бұл қалай күйді?» деп сұраса, «Дәрет сындырғанда тамшысы тиіп кеткен екен ғой» деп жауап берген екен. Содан «Тоқсан түйе томардың үстінде күймеген» деген аңыз қалған. Бұхарадағы Көкілташ медресесінде оқып жүргенінде Әйтеке би жүздеген шәкірттің ішінен таңдап алып, арқасына арқалап алып кеткен екен. Ол кезде Мүсірәлі он төрт жаста болған. Міне, сол кезден бастап Әйтеке бидің жанында жүреді.
– Ұрпақтары жайлы не білесіз?
– Үш әйелі болған. Cоңғы бәйбішесінен Сүгірәлі әулие, Мұхамбет Дербіс әулие деген ұрпақтар тараған. Сүгірәліден тараған ұрпақтары қазір Өзбекстандағы Керізбұлақ деген жердегі Басай қорымының маңында қоныстанған. Ал Қосымнан тараған ұрпақтары Қызылорда жақта. Қарақалпақстан жақта да ұрпақтары бар. Ол жердегі ұрпақтары өздерін керейт қожа деп атайтын. Бірақ кейінгі уақытта керейт деген сөзін алып тастап тек қожа деп аталып жүр. Білмейтін адамдар оларды арабтардан тараған қожалар деп ойлауы мүмкін. Бірақ та олар Мүсірәлінің ұрпақтары.
– Өзіңіздің де шыққан тегіңіз, отбасыңыз жөнінде де бірер сөз айта кетсеңіз...
– Әкем Ахметов Байназар Тамды ауданын ұйымдастырушыларының бірі болатын, көп жылдары ( 1939-1950) аудандық комитетте нұсқаушы, 3-хатшы болып қызмет атқарған. Өмірінің соңғы жылдары К.Маркс колхозында партком хатшысы болды.
Зайыбым Нәбира Қасымқызы жоғары санатты дәрігер, Қазақ ССР Жоғарғы Советінің Құрмет грамотасымен марапатталған. 1968-1971 жылдары Тамдының аудандық ауруханасында бас терапевт болып жұмыс істеген. Нөкістің қазағы.
Қызым Шолпан ҚазМУ-дың филология факультетін бітірген, оқытушы. Ұлым Нұрлан КИМЭП-ті бітірген, швейцариялық ірі компанияның атқарушы директоры. Төрт немерем бар.
– Әңгімеңізге рақмет!
Өмірдерек
Жауғашты Байназарұлы Ахметов 1944 жылы Өзбекстандағы Тамды ауданының Керізбұлақ елді мекенінде дүниеге келген. 1966 жылы Самарқан медицина институтын үздік дипломмен бітіріп, сол институттың патологиялық анатомия кафедрасында жұмысқа қалдырылған, 1971 жылдан медицина ғылымдарының кандидаты. С.Ж.Асфендияров атындағы Қазақ ұлттық медицина университетінде 1979 жылдан бері қызметте. Патология терминдерін қазақша сөйлеткен бірінші ғалым.
1992-1996 жылдар аралығында ұлт жанашыры есебінде Халықаралық қазақ-түрік университетінде ХҚТУ медицина факультетінің физиология, патологиялық физиология және патологиялық анатомия кафедраларының меңгеруші болып жұмыс істеп, ұлттық кадрлар дайындаған. 1996 жылы ХҚТУ профессоры болып сайланған. 2003 жылдан бері ҚазҰМУ профессоры. «Денсаулық саласына қосқан үлесі үшін» және Байтұрсынұлы атындағы «Алтын медальмен, «Университет Алтын медалімен» марапатталған, «Жыл оқытушысы» (2004) деп танылған. 2005 жылы Мәскеу ғалымдарымен қосылып «Гистология, цитология және эмбриология атласын» шығарған, бұл 403 түрлі-түсті суреттермен безендірілген, дүниежүзілік деңгейде жазылған оқу құралы.
Сұхбаттасқан Төреғали ТӘШЕНОВ
Дереккөзі: aikyn.kz