Қытайлық компаниялар мен ғалымдар көмір өндіру қалдықтары мен көмір жағылғаннан кейінгі күлден литий, галлий, германий және сирек жер элементтерін ала бастады. Көршілес ел мұндай үйінділерді электроника, аккумуляторлар және қорғаныс өнеркәсібі үшін стратегиялық маңызды шикізаттың жаңа көзі ретінде қарастырып отыр.
Бұрын көмір өндірілгеннен кейін қалатын тау жыныстары мен көмір электр станцияларынан шығатын күл цементке арзан қоспа ретінде пайдаланылатын немесе жай ғана үйіліп сақталатын еді. Соның салдарынан үлкен аумақтар жарамсыз болып, қоршаған орта ластанатын. Енді билік пен өнеркәсіп өкілдері оларды бағалы металдардың көзіне айналдыруға тырысып жатыр.
Қытай тау-кен ісі және технологиялар университетінің профессоры Дай Шифэн көмір қалдықтарының құрамында металл элементтері көп екенін және олар аса маңызды металдарды жеткізудің маңызды көзіне айналуы мүмкін екенін мәлімдеді.
Қытай бұрыннан бар өнеркәсіптік инфрақұрылым мен қайта өңдеу технологияларына басымдық беріп отыр. Зерттеулер көмір күлі мен тау жыныстарында электромобильдер, жел генераторлары, жартылай өткізгіштер және телекоммуникациялық жабдық өндірісінде сұранысқа ие сирек жер элементтері жиналуы мүмкін екенін көрсетеді.
Мұндай технологияларға қызығушылық стратегиялық маңызды шикізат үшін жаһандық бәсекенің күшеюі аясында артып келеді. Қытай сирек жер металдарын өңдеу бойынша әлемдік көшбасшы болып қала береді және ел ішінен жаңа ресурс көздерін іздеуді жалғастырып жатыр.
Дереккөз: https://interestingengineering.com/innovation/china-coal-waste-become-critical-resource
Фото: Istock
