Зерттеу тобы сутегі өндіру жүйелерінде кеңінен қолданылатын қымбат платина негізіндегі материалдарды алмастыруға назар аударды. Олардың тәсілі су молекулаларынан сутегіні бөліп алу үшін күн, жел немесе су энергиясынан өндірілетін жаңартылатын электр қуатын пайдалануға негізделген.

«Суды сутегіге айналдыру — энергияны әртүрлі мақсатта сақтаудың өте тиімді жолы. Сутегінің өзі энергия тасымалдаушы ретінде қолданылып, түрлі химия өнеркәсібі мен өндіріс салаларында пайдалы бола алады», –  деді профессор Ган У.

Катализаторды жасау үшін зерттеушілер рений фосфиді (Re2P) мен молибден фосфидін (MoP) біріктірді. Бұл екі материал бірігіп, сутегіні бөліп алу процесін жақсартатын жоғары тиімді композит түзді. Рений компоненті сутегінің катализатор бетіне байланысып, қайта бөлінуіне көмектесе отырып, процесті тиімдірек етті. Ал молибден сілтілі электролиттегі судың ыдырауын жылдамдатты.

Зерттеу тобы жаңа катализаторды никель-темір анодымен бірге қолданып көріп, жүйенің қазіргі ең озық катодтардың бірінен, соның ішінде платина тобы металдарына (PGM) негізделген үлгілерден де жақсы нәтиже көрсеткенін анықтады.

Ган Удың айтуынша, катализатор өнеркәсіптік деңгейдегі 1 және 2 ампер/см² ток тығыздығында 1000 сағаттан астам тұрақты жұмыс істеген. Осылайша ол анионалмасу мембраналы су электролизерлеріне арналған платинасыз ең төзімді катодтардың бірі болып отыр.

 

Тәжірибелер зертханалық деңгейде жүргізілгенімен, зерттеушілер бұл технологияны өнеркәсіптік ауқымда қолдану мүмкіндігін әрі қарай зерттеуді жоспарлап отыр.