Ғалымдар бұл технологияны табиғаттан, нақтырақ айтқанда, цикада мен инелік сияқты жәндіктердің қанаттарынан шабыт алып әзірлеген. Пластиктің бетіне енгізілген наномөлшерлі өрнектер вирус бетке түскен сәтте оның қабықшасын механикалық түрде созып, жыртып жібереді. Соның нәтижесінде патоген толық жойылады.

Зерттеу нәтижелері көрсеткендей, материал адам парагриппінің 3 типті вирусына қарсы жоғары тиімділік танытқан: бір сағат ішінде вирустардың шамамен 94%-ы жойылған немесе көбейе алмайтындай зақымданған.

Бұл технология дәстүрлі химиялық дезинфекция құралдарына балама бола алады. Себебі қазіргі әдістердің кемшіліктері бар: олар ұзақ уақыт ылғал күйде болуы керек, қайта ластану жылдам жүреді, ал кейбір химиялық заттар қоршаған ортаға зиян келтіріп, микробтардың төзімділігін арттыруы мүмкін.

Жаңа тәсілдің басты артықшылығы – химиялық заттарды қолданбай, материалдың өзін нанодеңгейде өзгерту арқылы антивирустық әсерге қол жеткізу. Сонымен қатар, бұл пленканы өнеркәсіптік көлемде, мысалы, тағам қаптамасына ұқсас рулон түрінде өндіруге болады.

Дегенмен, әзірге технология тек қабықшасы бар вирустарға қатысты сыналған. Алдағы зерттеулер оны басқа, төзімдірек вирустарға қарсы тексеруге бағытталады.