A&M Техас университетінің ғалымдары дәстүрлі литий-ионды батареяларды алмастыра алатын табиғи материалдардан биологиялық ыдырайтын батарея әзірледі. Зерттеу нәтижелері Proceedings of the National Academy of Sciences журналында жарияланды.
Жаңа батареяның негізгі компоненттері ретінде адам ағзасында кездесетін рибофлавин (В2 дәрумені) және L-глутамин қышқылы қолданылады. Материал редокс-белсенді қасиетке ие, бұл оған энергияны жинақтап, қайта беруге мүмкіндік береді, сонымен қатар ол суда немесе ферменттердің әсерінен қауіпсіз түрде ыдырайды.
Металдар мен мұнай-химияға негізделген литий-ионды батареялардан айырмашылығы, жаңа батарея толығымен жаңартылатын биологиялық көздерден жасалған. Зертханалық зерттеулер материалды анод ретінде қолдануға болатынын және фибробласттар үшін улы емес екенін көрсетті, бұл имплантацияланатын және киюге болатын құрылғыларда қолдану перспективаларын ашады.
Жобаны химия профессоры Карен Вули мен химиялық инженерия профессоры Джоди Люткенхаус басқарды. Батарея дизайны материалдарды қайта пайдалануға, қайта өңдеуге немесе табиғатқа қауіпсіз оралуға болатын циклдік экономика қағидаттарына бағытталған, дейді зерттеушілер.
Ғалымдардың айтуынша, жаңа батареяның электр-химиялық сипаттамалары синтетикалық полимерлер негізіндегі жүйелермен салыстырмалы болғанымен, оны коммерцияландыру үшін өндіріс шығындарын азайту қажет. Экономикалық тиімді технологияларды әзірлеу 5 жылдан 10 жылға дейін созылуы мүмкін.
Дереккөз: https://qazaqgreen.com/kz/news/world/3024/
Фото: Istock
