Қорқыт ата атындағы Қызылорда мемлекеттік университеті – Сыр өңіріндегі 80 жылға жуық тарихы бар, халықаралық білім кеңістігінде танылған, білім беру қызметінде өзіндік дәстүрі қалыптасқан оқу ордасы.
Университет жоғары және жоғары оқу орнынан кейінгі білімді, бәсекеге қабілетті мамандар даярлауды жүзеге асыра отырып, еліміздің ғылыми, әлеуметтік-экономикалық, мәдени дамуын жүзеге асыруды өзінің стратегиялық дамуының басым бағыты ретінде қабылдаған. Университетте бакалавриаттың 54, магистратураның 30, докторантураның 9 білім бағдарламасы бойынша мамандар даярланады. Қазіргі таңда университетте 23 ғылым докторы, профессор, 206 ғылым кандидаты, доцент, 187 ғылым магистрі еңбек етеді. Міне, осы орайда Қорқыт ата атындағы Қызылорда мемлекеттік университетінің ректоры, техника ғылымдарының докторы, профессор, ҚР ҰИА академигі
Қылышбай Алдабергенұлы Бисеновпен тілдескен едік.
– Елбасы Н.Назарбаев «100 нақты қадам – баршаға арналған қазіргі заманғы мемлекет» атты Ұлт жоспарында орта мектептердің жоғары сыныптары мен жоғары оқу орындарында білім беруді ағылшын тілінде жүзеге асыру қажеттігін атап өтті. Бұл бағытта қандай жұмыстар атқарылуда?
– Университетте нарықтың өзгермелі жағдайына бейімделген, бәсекеге қабілетті, кәсіби білікті мамандар даярлау бағытында 2012-2013 оқу жылынан бастап бакалавриаттың 16 мамандығында оқу үдерісін көптілді білім беру бағдарламасы бойынша қазақ, орыс, ағылшын тілдерінде жүзеге асырылып келеді. Үш тілді еркін меңгеру арқылы академиялық ұтқырлық, қос диплом бағдарламалары аясында университеттің 50-ге жуық студенттері мен магистранттары Америка Құрама Штаты, Түркия, Австрия, Оңтүстік Корея, Польша, Египеттің жоғары оқу орындарында білімдерін жетілдіріп келді. Сонымен бірге 2013-2014 оқу жылынан бастап шетел тілі: екі шетел тілі мамандығы бойынша 1-курсқа қабылданған студенттерден екінші шетел тілі ретінде корей, қытай, араб тілдерін оқыту мақсатында ағылшын-кәріс, ағылшын-қытай, ағылшын-араб тілдері бойынша оқу топтары жасақталған. Студенттердің таңдауы бойынша мұнай-газ ісі және технологиялық машиналар мен жабдықтар мамандықтарының 3-курстарына қосымша қытай тілі оқытылуда.
– Қылышбай Алдабергенұлы, Елбасы Жолдауларында үнемі назарда тұрған тағы бір мәселелердің бірі – ғылым мен өндірісті ұштастыру. Осы мақсатта университет ғалымдарының атқарып жатқан жұмыстарына тоқталып өтсеңіз...
– Аймақтың әлеуметтік-экономикалық және рухани-мәдени саласына қатысты ғылыми-зерттеулерді жүзеге асыру, алынған ғылыми нәтижелерді өндіріске бағыттау мақсатында университетте «Физика-химиялық талдау әдістері» инженерлік бейіндегі зертханасы, «Технологияларды коммерцияландыру» орталығы, «Аймақтық кәсіпкерлікті дамыту» орталығы, «Агробиологиялық және қолданбалы зерттеулер» ғылыми орталығы, «Қорқыттану және өлке тарихы» ғылыми-зерттеу институты, «Археология және этнография» ғылыми-зерттеу орталығы нәтижелі жұмыстар жүргізуде.
Пайдалы қазбаларды, оның ішінде мұнай мен газ қорын сақтау өзекті мәселе, яғни бұлардың да қоры шектеулі. Осы ретте ғалымдардан табиғи жаңа қорларды табуды талап етеді. Бұл тұрғыда Қорқыт ата атындағы Қызылорда мемлекеттік университеті баламалы қуат көздерін іздестіру ғылыми-зерттеу жұмыстарын белсенді жүргізуде. Қызылорда облысында баламалы қуат көздерінің қажетті әлеуеті жеткілікті.
Университет ғалымдары күн қуатын пайдалану бағытында ғылыми-зерттеу жұмыстарын жүргізуде. Аймақтағы бар табиғи ресурстарды ұтымды пайдалану жөнінде де технологиялық әзірленімдер ұсынылып, өндірістік жағдайларда сыналды, тағы бір маңызды міндет өндірістік қалдықтарды пайдаға қайта жарату тетігін жетілдіру.
Соңғы жылдары «Физика-химиялық талдау әдістері» инженерлік бейіндегі зертханасында жүргізілген зерттеулер аясында келесі ғылыми нәтижелер алынды:
– Қазақстанның мұнай өңдеу зауыттарының крекинг-газдарының олефиндік шикізаты негізінде карбон қышқылдарының күрделі эфирлерін алу тәсілдері, парфюмерия-косметикалық тауарлар өндірісінде және фармацевтикалық салада антибактериалды заттар ретінде пайдалануға болатын препараттар табылды;
– өсімдіктерді қорғау құралы ретінде жаңа фосфорорганикалық қосылыстар алу бағытында арнайы зерттеулер жүргізілді. Қазіргі кезде алынған заттар университеттің жылыжай шаруашылығында тәжірибелік сынақтан өтуде;
– жантақтың сығындысын атеросклероздың алдын алу және бастапқы сатысында емдеуге қолдану мәселесі зерттелуде. Аталған сығындыдан биологиялық белсенді компоненттерді алу жолдары қарастырылуда;
– аса жоғары жиіліктегі сәулелендіру жағдайларында карбон қышқылдарының күрделі эфирлерінің синтезі әзірленді. Соның нәтижесінде, жоғарыда аталған қосылыстарды өнеркәсіптік негізде алу уақыты мыңдаған есеге қысқарды;
– мұнайдың ауыр фракциясынан ұзынтізбекті олефиндер алынуда. Олардың негізінде базалық жағармайлар алу технологиясы зерттелуде.
Жаңа оқу жылы қарсаңында Қазақстан Республикасы Білім және ғылым министрлігінің Білім және ғылым саласындағы Бақылау комитетінен бакалавриаттың техникалық бағыттағы жаңа 6 мамандығына лицензия берілді. Олар: геология және пайдалы қазбалар кен орнын барлау, тау-кен ісі, бейорганикалық заттардың химиялық технологиясы, органикалық заттардың химиялық технологиясы, пайдалы қазбаларды байыту, ақпараттық қауіпсіздік жүйелері.
Бұл мамандықтар облыс әкімі Қырымбек Елеуұлы Көшербаевтың бастамасымен бекітілген «Қызылорда облысының 2020 жылға дейінгі әлеуметтік-экономикалық даму стратегиясына» сәйкес облыстағы мұнай және газ қорымен қатар, тау-кен және металлургия қорларын игеру үшін тиісті сала мамандарын даярлау мақсатында ашылып отыр. Аталған мамандықтарға студенттер қабылдау 2016 жылдан бастап жүргізілетін болады.
– Жоғары оқу орындарына қойылар талаптың бірі – аккредиттеуден және аттестаттаудан өту. Аймақтағы іргелі білім ордасы ретінде Қорқыт ата атындағы Қызылорда мемлекеттік университеті бұл талаптарға жауап бере ала ма?
– Әрине, университет институционалдық және арнайы мамандандырылған аккредиттеуден, мемлекеттік аттестаттаудан өткен аймақтағы іргелі білім ордасы. Университеттің 21 білім бағдарламасы мамандар даярлау бағыттары мен деңгейлері бойынша Аккредиттеу және Тәуелсіз рейтинг агенттігінің жүргізген рейтинг нәтижесінде, еліміздің жоғары оқу орындары арасында 7-орынды иеленіп, Қазақстанның көпсалалы жоғары оқу орындарының «ҮЗДІК-20» тобына енді.
Биыл мамандар даярлау бағыты мен деңгейлері бойынша жоғары оқу орындарының тәуелсіз рейтингісінің қорытындысы нәтижесінде университеттің 8 білім бағдарламасы үздік үштікке енді. Бұл оқу орнында жұмыс жасап жатқан 5 факультет, 33 кафедра, ғылыми-зерттеу орталықтары мен заман талабына сай материалдық-техникалық базасы, профессор-оқытушылар құрамы, университеттің республикалық, шетелдік жоғары оқу орындарымен әріптестік байланысы және бакалавриат, магистратура, докторантура бойынша білім алушылардың білім сапасының жоғары екендігінің дәлелі.
– Биыл елімізде Қазақ хандығының 550 жылдығы, Қазақстан Республикасы Конституциясының 20 жылдығы, Қазақстан халқы ассамблеясының 20 жылдығы мемлекеттік деңгейде аталып өтілуде. Жастарға патриоттық тәрбие беруде тарихи маңызы зор осы мерекелерге байланысты қандай жұмыстар атқарылуда?
– Әрине, егемен еліміздің Ата заңы – Конституция мызғымас мемлекетіміздің алтын қазығы, бірлігі мен ынтымағы жарасқан еліміздің кемел келешегінің кепілі. Бұдан 20 жыл бұрын, ғасырлар тоғысында әлемдік өркениетке қадам басқан Қазақстан халқы тарихи шешім қабылдап, жасампаз жаңа дәуірді бастады.
1995 жылы 30 тамызда мемлекеттің ұстанымын, ұлттың құндылығын айқындайтын негізгі құжат Конституция қабылданды.
Қазақстанның мемлекеттігінің нығаюына, еліміздің өсіп-өркендеуіне негіз болатын Ата заңымыз, тәуелсіздігімізді тұғырлы етуге де әлеуетті екенін бүгінгі күні дәлелдеп отыр.
Елбасы Нұрсұлтан Назарбаев 2015 жылғы 28 тамызда Конституцияның қабылдануының 20 жылдығына арналған халықаралық ғылыми-практикалық конференцияда «Біз барын бағалап, қымбатын қадірлей білген елміз. Азаттығымыздың айшықты айғағы болған Ата заң – тәуелсіздіктің теңдессіз тартуы. Сан буын ұрпақ алмасса да ескірмейтін, жыл өткен сайын жаңғыра беретін құндылықтар жинағы. Мемлекеттігіміздің алтын қазығын қастерлеу – әрбір қазақстандықтың қасиетті парызы. Конституцияның әрбір сөзін мүлтіксіз орындап, бұлжытпай сақтасақ алар асуымыз әрдайым асқақ болады. Сол арқылы Мәңгілік елдің тұғырын нығайтып, шаңырағын биіктете түсеміз» деген болатын. Олай болса, Ата заңымыз – Конституцияны құрметтеп қорғау, оның маңыздылығын сақтау еліміздің әрбір азаматының қасиетті борышы.
Университетте жастарға сапалы білім берумен қатар, олардың бойына ұлттық құндылықтарды сіңіре отырып, патриоттық тәрбиелеу жұмыстары жүйелі жолға қойылған. Ұлт Көшбасшысы Н.Назарбаевтың Мәңгілік ел ұлттық идеясын жүзеге асыру мақсатында университетте Назарбаевтану ғылыми-оқу орталығы және «Мәңгілік ел» оқу-тәрбие орталығы ашылды. Мұндағы басты мақсат – Елбасының ел тәуелсіздігін баянды етудегі, халықаралық аренада Қазақстанның беделін арттырудағы ерен еңбегін жастар арасында кеңінен насихаттау. «Мәңгілік ел» оқу-тәрбие орталығының мақсаты – ұлттық сана-сезімі, азаматтық, отансүйгіштік қасиеттері жоғары, ұлт мәдениетін дамыту мен сақтаудағы жауапкершілікті сезіне білетін, тарихи ой-өресі жетілген, өзге мәдениет өкілдерімен жүйелі сұхбат құра алатын жастарды тәрбиелеу болып табылады.
Сонымен бірге мерейлі мерекелерді атап өтуде университетте ғылыми-тәжірибелік конференциялар ұйымдастырылып, көрнекті ғалымдар шақырылуда.
– Қылышбай Алдабергенұлы, мазмұнды сұхбатыңыз үшін алғысымды білдіремін! Жаңа оқу жылы құтты болсын! Өзіңізге және білім ордасының ұжымына зор табыс тілеймін!
Миуа БАЙНАЗАРОВА,
Қызылорда қаласы
Дереккөзі: aikyn.kz