Қазақстанда алғаш рет ыстық пен құрғақшылыққа төзімді жаңа жоңышқа сорты – «Төзімді» әзірленді. Атауының өзі «берік, тұрақты» деген мағынаны білдіретін бұл сортты Қазақ ауыл шаруашылығы және өсімдік шаруашылығы ғылыми-зерттеу институтының (ҚазЕжӨШҒЗИ) ғалымдары Аустралияның SARDI институтымен бірлесіп шығарды.
Жоба BOLD (Biodiversity for Opportunities, Livelihoods and Development) халықаралық бағдарламасы аясында Crop Trust ұйымының және Норвегия үкіметінің қолдауымен жүзеге асырылды.
ҚазЕжӨШҒЗИ профессоры Ғалиолла Мейірманның айтуынша, жаңа сорт су тапшылығынан зардап шегіп отырған фермерлерге үлкен көмек болады: «Мұздықтардың шегінуіне байланысты су тапшылығы күшейіп келеді. “Төзімді” сорты фермерлерге суарылмайтын алқаптарда да жоңышқа өсіруге мүмкіндік береді».
Жаңа сорт жергілікті жоңышқаларды құрғақшылыққа бейім жабайы туыстарымен будандастыру арқылы алынған. Өсімдік –20°С-тан +40°С-қа дейінгі температурада жақсы өседі. Сынақтар Қызылорда, Жамбыл, Түркістан және Алматы облыстарында жүргізіліп, жоғары өнімділік пен аязға төзімділік көрсетілген.
«Төзімді» сорты жылына үш-төрт орымға дейін өнім береді, мал азығының сапасын арттырады және жердің құнарлылығын сақтауға ықпал етеді.
SARDI институтының ғалымы, доктор Алан Хамфрис Қазақстан тәжірибесі климаттық қиындықтарға бейімделудің халықаралық үлгісі бола алатынын атап өтті. «“Төзімді” – ғылым мен фермерлер ынтымақтастығының нақты нәтижесі», – деді ол.
Дереккөз: https://kazniizr.kz/kazahstanskie-uchyonye-vyveli-novuyu-klimaticheski-ustojchivuyu-lyuczernu-tozimdi/
Фото: Istock
