Қытайда зерттеушілер ғарышкерлерге арналған шағын кір жуғыш машина жасап шығарды. Салмағы 12 келі құрылғы киімді бір циклде небәрі 400 мл су жұмсап, ультрамайда тұман мен озонның көмегімен тазартады, деп хабарлайды South China Morning Post.
Chinese Journal of Space Science журналының мәліметінше, технология «Тяньгун» орбиталық станциясы мен болашақ ай базаларына жеткізілетін киім көлемін 60%-дан астам көлемде қысқартуға мүмкіндік береді. 15 жылдық миссиядағы үш адамнан тұратын экипаж үшін бұл – 3,3 тоннадан астам киім.
Осы уақытқа дейін ғарышкерлердің орбитада киімдерін жууға мүмкіндігі болмаған. Олар киімін жағымсыз иіс пайда болғанша киіп жүрді, содан кейін оны Жер атмосферасында өртеніп кеткен жүк капсуласына тастап келді.
- Ай мен Марсқа болашақ ұзақ мерзімді миссияларды ескере отырып, борттық кір жуу технологиясын дамыту Жерден келетін жеткізілім жүктемесін азайтудың кілті болады, - деп атап өтті зерттеу авторлары.
Машина кем дегенде бес жыл жұмыс істеуге арналған және микрогравитацияның ерекшеліктерін ескереді. Ол маталарды химиялық заттарсыз зарарсыздандырады және ылғал мен газдың кемуіне жол бермейді. Келесі кезең – жұмыс прототипін құру және құрылғы тиімділігін арттыру.
Дереккөз: https://kaz.inform.kz/news/kitaylik-galimdar-garishka-arnalgan-kr-zhugish-mashina-zhasap-shigardi-0a989b/
Фото: SCMP
