Халықаралық зерттеушілер тобы баланың семіздікке шалдығу қаупін белгілер пайда болғанға дейін болжауға мүмкіндік беретін генетикалық тест жасап шығарды. 5 миллионнан астам адамның генетикалық деректері негізінде құрылған полигендік қауіп шкаласы (ПҚШ) адамның артық салмаққа бейімділігін бала жасынан-ақ анықтай алады.
Nature Medicine журналында жарияланған бұл зерттеу – әлемнің түкпір-түкпіріндегі 500 ғылыми мекемеде жұмыс істейтін 600-ден астам ғалымның бірлескен еңбегінің нәтижесі. Зерттеудің жетекші авторы, Копенгаген университетіндегі Іргелі метаболикалық зерттеу орталығының доценті Рулоф Смиттің айтуынша, жаңа әдістеме "баланың ересек жаста семіздікке шалдығу ықтималдығын басқа қауіп факторлары әсер ете бастағанға дейін, бала бес жасқа толмай тұрып болжауға мүмкіндік береді". Оның айтуынша, бұл тәсіл ерте профилактикалық шаралардың тиімділігін айтарлықтай арттыра алады.
Жаңа генетикалық тест болжам дәлдігі жағынан бұған дейінгі ең жақсы тестен екі есе тиімді болып шықты. Ғалымдар қазіргі таңдағы ең ірі генетикалық деректер базасын пайдаланып, полигендік қауіп шкаласын (ПҚШ) 500 мыңнан астам адамға сынақтан өткізген. Зерттеу барысында олар семіздікке қатысы бар мыңдаған генетикалық нұсқаларды анықтады, олардың ішінде ми қызметіне және тәбетті реттеуге әсер ететіндері бар.
Алайда тесттің тиімділігі адамның этникалық шығу тегіне байланысты екенін айта кету керек. Ол тегі еуропалық адамдар үшін жақсы жұмыс істесе, тегі африкалық адамдарда төменірек нәтиже көрсеткен. Бұл полигендік қауіп шкаласын әртүрлі популяциялар үшін әрі қарай бейімдеу қажет екенін аңғартады.
Дереккөз: https://smartpress.by/news/uchenye-sozdali-geneticheskiy-test-dlya-prognozirovaniya-ozhireniya-v-detstve-on-vdvoe-tochnee-predy/
Фото: Depositphotos.com